vendredi 26 juin 2009

yin et yang


المعروف انو ها الشكل ظهر في الصين قبل ما يتولد المسيح بثلاثة قرون و بيه نجموا نقولوا اللي التفكير التاوي ولّى مألوف عند الغرب ..من وجهة رأي برشة , الين و اليانغ يكشفنا اللي حاجة مستحيلة انّا احنا نجمّوا نترجموا بكلامنا شنوة اي رسم يوحيلنا
ما نبعدوش لبعيد ياسر , اسم "ين و يانغ" يعطينا احساس بالقطيعة ما بين " الكلمات المتكونة منها العبارة يعني "ين" و "يانغ" ...جل التعليقات اللي قالوها الناس على هذا الشكل فيها تركيز علو ان فما اختلاف ما بينهم الزوز : "اليانغ" يمثلوا الجزء الاسود من الشكل و هو مربوط بالسماء و بالجنس الذكري و بالجبال و بالاعداد الفردية في حين ان "الين" يمثلوا الجزء الابيض و هو مربوط بالارض و بالجنس الانثوي و بالوادي و بالاعداد الزوجية و هكة نفهموا من التعاليق اللي فمّا ايحاء بالتقابل ما بين العناصر في الكون و اللي زيادة متاع عنصر تتسب في تراجع العنصر المقابل ليه ..اما الواحد كي كي يتمعن في رؤية الرسم مليح يشوف اللي فمّا علاقة اتصّال و "تضامن" ههه متاع التقابلات خاتر العنصر ما يعرف وجودو كان بوجود العنصر المقابل..اليانغ كي نعطيوه مفهوم ماهوش هو الين و العكس صحيح ...الدائرة الصغيرة السوداء في وسط الجزء الابيض و البيضاء في وسط الجزء الاسود تورّي تواجذ العنصر المعاكس في داخل كل عنصر ..مثال الحب والكره ما نجموش نحسو نيهم و لا نعيشوهم كان فماش واحد منهم في مسار الاخر ...يعني اجنا ما ناش نواجهو ا في حقيقتين مستقلين على بعضهم بقدر مااحنا نواجهوا في زوز مظاهر لنفس الشيء و بالتالي احنا ناخذو زوز وجهات نظر على نفس الشيء .....

الين و اليانغ خلاو برشة علماء يربطوا علاقة ما بين التفكير التاوي و الفيزياء كيما في الفيزياء النسبية احنا نحسبوا الزمان "معين" وحدو و المكان "معيّن " اخر وحدو منفصلين على بعضهم بش نحددو الاحداث فيزيائيا اما هوما في الواقع ماهومش مستقلين على بعضهم تماما و يشكلو مع بعضهم وحدة مكان-زمان اللي نعيطولها "ريفرنسيال".

من ناحية اخرى, نراو الين و اليانغ محاط بدائرة بلاش بيها ما يتوجدش و يفقد معناه ...ها الدائرة تمثل الحقيقة كلها و الشكل هذا اختارو الفرعون "اخناطون" بش يمثل الاه الوحيد اللي حبّ يعوّض بيه تعدد الالهة الموجودة في مصر...ها الدائرة ما تنجم تكون كان الشمس بدون اي شك و خاصة الحاجة" البرفات" اللي تحيط بكل حاجة موجودة ...

jeudi 25 juin 2009

هل انا مسلم او ملحد؟؟؟؟

ما قيت ما نعمل نستنى في صحابي بش نخرجوا نكملوا السهرية اللي ظاهرلي بش تولي صبحية ..قلت نكتب تدوينة نبلور فيها صفة الذاتية اللي نعتوني بيها برشة عباد في الفايس بوك و قالولي مدونتك يغلب عليها استبطانك لنفسيتك اكثر من عرض لافكارك ...ما عليناش انا في ها الليلة المجيدة اخترت بش نحكي على روحي ..بش نحكي على حالة الريبية اللي وصلتلها و حالة الشك في كل شي... في الاه و في الاديان و في نفسي..قداش الدنيا تتبدل يا بو قلب ..على قدر ما كنت تقي و شادد ببوشتي و نعشق دين الاسلام و نفد من شكون يقوم بازدراؤو قدامي و لا شكون يربرب قدامي ..زبي ما نحملش شكون يحل فمو و يجبد الذات الاهية بالخايب و لا يتهم الاسلام باي تهمة تطيح من قيمتو كدين سماوي جاء بش يكمل مكارم الاخلاق ...بصراحة كنخزر ال روحي توة و قبل باشهر نبهت ..نقول شوف الانسان قداش يتبدل في فكرو و عقيدتو و في قناعاتو ..بعد ما عدا فترة هامة يكرع من شتى ضروب الدغمائية و هو مكبل بالعادة و ما يمارس في حتى نشاط يخرجوا من حالة السبات الوثوقي اللي كان راقد فيه ...صدقوني كنت نعشق دين الاسلام ..نموت على كتب الدعاء و اللي حفظت منهم برشة ..نرى في الانسان المصلي انسان مثالي ما يغدرش و ما يعملش الدوني لغيرو ...كنت نحط المسبحة بحذا راسي في الليل و لا نسبح بصوابعي و نشد في "اللهم صلي و سلم وبارك على سيدنا محمد"و نشد ليلة كاملة و انا نحاول نقولها 1000مرة خاترني طامع بش نغفر ذنوبي و لو كانت على عدد اوراق الاشجار..نقوم في الليل نصلي قيام الليل و نصلي الصبح حاضر ..3 سنين بدون انقطاع و انا نحاول نحافظ على صلاتي و نمشي للجامع رغم تحذير العائلة الكريمة من مغبة الوقوع في شراك الخوانجية و الغوص معاهم في نقاشات بيزنطية تنجم تعملي غسل دماغ...دارنا ما يحبونيش نتفرج في قناة المنار وقتلي كنت في الابتدائي ..برشة اصدقاء العايلة يبداو يتغامزوا علي وقتلي يجيو بش يتقهوجو و يعملو السهريات الخمرية الفاخرة متاعهم يراوني بش نخرج للشارع يبداو يضحكوا "شنوة قاصد ربي للجامع ..رد بالك يتنقض عليك الوضوء" و يشيخو بالضحك ..ما نحكيلكمش على علاقتي بالجنس الاخر كيفاه كانت....قداش كنت نضحك برجولية ..تتعدى طفلة في الشارع نهبط عيني زعمة زعمة غض من الابصار..كانت الفتاة او المرأة المتحجبة ياسر مقامها عالي عندي..نرى فيها المرأة الصالحة و التقية اللي تفهم دينها و ما تطيحش في الخطيئة ..كنت نجري وراء الوالدة بش تتحجب ..ياسر كنت نضحك بصراحة ..عديت طفولتي نقري في قصص الانبياء (نتذكر كتاب ابن كثير قريتو الكل و انا سادسة ابتدائي)و قصص السيرة النبوية و زوجات الرسول ...كنت نسأل الوالد على كنائس روسيا هل هي كاتوليكية ولا اورتودكسية و كانت اجابتو لنو الاتحاد السوفياتي ما كانوش عاطين اهمية للدين و اللي السوفيات ما يستعرفوش بحاجة اسمها ربي ...قعدت باهت كيفاش هوما في اوروبا اللي اغلبيتها مسيحية و هوما ما يمنوش بالخالق؟؟؟؟
تعدات فترة الطفولة و تعدات فترة لاباس بيها من المراهقة..حتى هبطت علي مجموعة من الاسئلة اللي طرحتها على استاذة الاسلامية و ما عطاتنيش اجابة كافية وشافية كيما
توة كيفاش ربي يعرف كل شي علينا و مباعد يحاسنا على اعمالنا؟؟؟؟؟؟
تقولي الاستاذة قال ربي "فالهمها فجورها و تقواها"...توة هاذي اجابة ؟؟؟؟
قلت بلاكشي انا لها الدرجة بوهالي و اسئلتي مل حيط؟؟؟
و مباعد كي طحت نقرى على علم الكلام و الاشاعرة و المعتزلة اكتشفت اللي موش انا بوهالي خاتر مسالة تخيير وتسييير الانسان كان مشكل عند رواد الفلسفة الاسلامية
نكمل نحكي على الاسئلة الللي بدات تبعد في على ديني الفطري بشوية بشوية ...طحت نقرى على الفلاسفة في الفترة ما قبل سقراطية و في الحضارة الهلينتسية امثال مارك اورال و ابيكور و ديوجان و نشوف في فن العيشة متاعهم االي عجبني ياسر و طريقة تفكيرهم و طحت نقرى على الوجودية بداية من كتاب "الوجودية مذهب انساني" لسارتر و ناقش فيه بقلم رصاص بمرجعية اسلامية ما نجمتش نتخلص منها و قريت لنيتشة و كمل في الليسي قريت نظرية التطور و ريت الاستاذة كيفاش فسخت النموذج "الفيكسيست" و الاماركي و خلات النموذج الدارويني...بديت ندخل بعضي برجولية..فديت طلعت روحي ...ما نحبش نكون ملحد و نتبع افكار نيتشة و داروين و فرويد على خاتر قريت انها اداة لبسط السيطرة الصهيونية و نشر اللا اخلاق في البلدان غير اليهودية حسب بروتوكولات حكماء صهيون ..و ما نحبش يكون مجموعة من الاشخاص سبب في الحادي و منهم برشة من اصدقائي اللي تصدمت كسمعت بيهم ملحدين و ينطبق علي مثل"كلمة في الصباح و كلمة في العشية " تولي المسلمة يهودية" فهل انا ملحد او مسلم؟؟؟؟

mercredi 24 juin 2009

الحروف الهجائية العربية تعاني من التشويه المفعوصي

أ:ادارة ارجع غدوة
ب: بابا عندو المعارف
ت: تحول مبارك
ث: ثماش حويجة
ج: جاء يربح صادو بوربيح
ح: حاجتي و محتاج وما في حاليش
خ: خواف ماهوش راجل
د: دبر راسو صحة ليه
ذ: ذليل الله غالب
ر: ربي ينوب
ز: زبراط و ما يحشمش
ع: عهد جديد
غ:غار على الملمة و اللي فما
ص: صباب ماء على اليدين
ض: ضربوه كسرولوا خليقتو
ظ:ظالمينو مسكين
ط: طفي الضوء اش علينا
س: سيبني خلي نشطح
ش: شلواش خدمة معترف بيها
ف: فاش قام الواحد يكون قاعد يقوم يقفف
ك: كوارجي يعني شخصية هامة و الا مثقف و بالتالي كراكوز
ل : لا طاح لا دزوه
م: مقطع مريش مسكين
ن:نوفي
ه: هز و صبط كيما حب سي المفعوص
و: واي واي يا وخياني
ي: يزي فيه البركة

jeudi 18 juin 2009

الفلسقة الجديدة بفرنسا ..اشعاع حقيقي او مزيف؟؟؟


ليوم المدونة تتناول القواسم المشتركة اللي تربط الفلاسفة الفرنسيس متاع القرن العشرين و شوية نقد لفلسقتهم و دوافع شهرتهم .
ما يميز" الفلاسفة الجدد " عن الفلاسفة لخرين و الحاجة اللي تقرب ما بينتهم انهم كانوا الكل من المساهمين و لا المنظرين لاحداث ماي 1968 بفرنسا و خذاو الكل ها الاحداث بش ينطلقوا منها في اعمالهم .و كلاو صبعهم و ندموا كي فشلت الانتفاضة و شكوا الكل في الماركسية بعدما كانو يعتنقوا هالمذهب (الاتجاه الماوي و الترتسكي...) و اعلنوا الكل قطيعة بينهم القطيعة بينهم و مابين الفلاسفة الاكادميين التقليديين من افلاطون الى هيقل و ما سلكها من ها القطيعة كان فيلسوف القوة(فريدريش نيتشة ..ههه) جيل دلوز يراه مخلص الفكر الحديث من القيود اللي تكبل فيه ..و القطيعة هاذي ما تتمثلش في اعتبار الفلاسفة القدم موش صالحين للتوجيه و الاقتداء اكهاو اما في تصويب الكلام السلبي النابع من العاطفة .نقولو احنا "خالف تعرف".الجموع هاذم يراو رواحهم "ماجور" و ينجموا يخمموا وحدهم ما غير العودة للتقليدي و التراث الفلسفي كلى راسو و كان اداة لتكريس عبودية الانسان خاترو مربوط ديما بمصالح البرجوازية و تنكروا الكل لفرويد و حاولو تبديل التحليل النفسي بصيغ تحليل اخرى التحليل الفصامي بالنسبة لدلوز (الفصام=سكيزوفراني) في كتابو "الراسمالية و الفصام" اللي يرا فيه الي الراسمالية ماشية و تحرر الانسان حتى قريب يوصل لحالة الفصام......
الحاجة اللي نحب نشيرلها اللي اهتموا بقضايا الفلسفة و الاقتصاد السياسي و علم النفس ....و راو اللي الماركسية ماهي ايديولوجيات محاطة بقاوق و هيلمان و اللي القضايا متاع علم النفسي الفرويدي قاعد مسرح متاع تاويلات ...اما اللي يتعاب عليهم اللي هدموا و ما عرفوش يعطيو البديل الاكمل و هذا ممكن يعزى الى نقص في الموهبة ..كيما مخذاوش فكر منظم و منهجية دقيقة كيما الفلاسفة لخرين ...نقاو برشة هامشية و ياخذو قضية و يسيبو اختها ..واتفقوا على مهاجمة ماركس و ما عطاوش اي بديل و قعدوا شادين اللي القاموس الماركسي اصبح معدوم الصلوحية كيما بنواست وكلوكسمان
كيما تلهاو بالذة و الشهوات و الرغبات و جعلوا منها مكيفات للشخصية و اسسها شان ليوترد في" الاقتصاد الشبقي"(الشبق = الليبيدو) و قالو بتعويض التحليل النفسي بصيغ اخرى و ما عطاو لا قوانين و لا نظريات تخدم هالانواع الجديدة للتحليل..كيما كانت ارائهم ساعات متنافرة .....
و نجمو نقولو اللي الشهرة متاعهم راجعة بالاساس للمواقف السياسية المتذببة متاعهم بداو بماركس ..و مباعد تعددت مشاربهم فما شكون يعتر روحو من اقصى اليسار و فما شكون يمين و حتى اليمين الجديد ....و سخط عليهم اليسار الفرنسي خاتر تنكروا الماركس و شنعوا فيه ...نقاو اللي فرنسوا ميتران (الحزب الاشتراكي) و لوران ساليني ( الحزب الشيوعي) فدوا منهم و اعلنوا ذلك و تحرج منهم اليمين بسبب مناداتهم المكشوفة . للتمرد على راسمالية
خلو الساحة الفرنسية مم فلاسفة ممتازين امثال سارتر و بشلار و هو الي جعلهم يبرزوا كيما استعملوهم بطريقة غير مباشرة في مقاومة اليسار بالاضافة للدعاية متاع وسائل الاعلام ..

mercredi 17 juin 2009

الكوميديا الجنسية في السينما التونسية


كيفاش يعري السينمائين التوانسة الجسد في افلامهم؟ اش مازال باش نشوفوه بعد افلام الجنس و الخلاعة و الاباحة؟
اسئلة مازال يطرحها الغرب.و يحاولو يقاولها اجوبة من خلال تحليل جل الافلام التونسية متاع برشة مخرجين امثال
النوري بوزيد و فريد بوغدير و المنصف ذويب و الجيلاني السعدي و سلمى بكار و غيرهم

الاكيد برشة منهم لاحظوا اللي برشة مخرجين توانسة مازالو منبهرين بتوضيح معالم الجسد و تصوير المشاهد الجنسية بكل دقة حتى يعطيو للفيلم طابع الواقعية اكثر ما يمكن خاتر تمكن تكون المشاهد خادمة للحبكة الفلمية ...مثال اغتصاب العاهرة الجميلة في فيلم عرس الذيب للجيلاني السعدي الي تقوم بدورها الفنانة انيسة داود من طرف اربعة شبان فرد وقت و بدون اي رافة من عندهم ...نراو الممثلة من خلف و هي في وضعية(.احشم )و نسمعوا تاوهاتها و نراو النصف الاعلى للممثلين الرجال في حركة مستمرة مع الاشارة الى وجوههم لابراز حالة النشوة اللي يحسوا بيها
و لسائل ان يتسائل شنوة السبب اللي يخلي ها المخرجين يتجرؤوا انهم يصوروا هل اللقطات المثيرة و هوما عايشين في مجتمعات مسكرة اللعب و تعتبر مسالة الجنس مسالة خطيرة و محرمة و تعكس الفساد و الانحلال الاخلاقي اذا ما كانتش في اطار العلاقة الزوجية .

السبب نجموا نحسبوه وجيه و بسيط للغاية.و يتمثل في رؤية المخرجين التوانسة انو الالحاح على الجسد و الجنس حاجة لازمة بش الواحد يرى تصويرتو في المراية و يحل عينيه على الحاجات القبيحة و المشوهة في المجتمع متاعو ...حاجة صايرة و المجتمع التونسي يحب يخبيها و يجيبها "عقيدة و سلوك " ..

بلوجيك نجموا نتسالو ما مدى نجاح السينمائيين التوانسة في تناولهم للجسد و الجنس؟

بنظرة على مجموغة من الافلام الطويلة و المتوسطة و القصيرة ....نجموا نقولوا اللي فما نجاح في فيلم الحلفاوين لفريد وبوغدير و في "حمام الذهب بلاع الصبايا" للمنصف ذويب اللي لقى صيغة في تعامل مع الممنوع و المكبوت خلاتو يتعامل مع الممنوع و المكبوت بطريقة ناجعة ..من خلال رصد عيون الطفل المنبهرة بالجسد الانثوي العاري و اذن "الفرانقي"( الرجل اللي يحط الفحم بش يسخن الحمام) المتمرسة على التقاط اصوات الاسطلة و القباقب و الماء في الحمام ..و نجموا نقولو اللي الطريقة الفنية اللي تصور بها الجسد في فيلم "يا سلطان المدينة" للمنصف ذويب خاتر نقاو اللي المتعة الايروسية الشبقية مهمومة و كئيبة مثل كابة المضاجعة ما بين "الرجل السكير" و "المومس السمينة" و اللي تنجم تكون راجعة للوضع الاجتماعي و الاقتصادي العقيم و المتردي في وسط "الوكايل" في تونس ...

من ناحية اخرى , نلاحظوا اللي السينما التونسية عطات اهمية للرغبة الجنسية الانثوية المكبوتة و اللي مربوطة بقداش من عامل ....ناخذو فيلم "الخشخاش" لسلمى بكار كمثال ..حيث كانت البطلة (مثلتها ربيعة بن عبد الله) في حالة مزرية من الفراغ العاطفي و عدم اشباع شهواتها حتى في اطار علاقتها الزوجية المشروعة خاتر راجلها كان شاذ حنسي و هو شي اللي خلاها تدمن عل الخشخاش و توصل حتى ال ى مستشفى الامراض العقلية ...نراو لقطة و هي تحاول اثارة زوجها و هو غير مبالي و قالها "بش نرقد" و طفى الضو و خلى لهيب شهوتها يطفى و وتوترت اعصابها ....

و في فيلم "البزناس" للنوري بوزيد نراو شهوة "خمسة" تجاه المصور الفرنسي اللي تترددلوا على بيتو في الفندق و فيها تصاورها و تصاور خطيبها روفة ....الاغتصاب الجسدي اللي تحس بيه خمسة هو الاغتصاب متاع تصاورها و هي عريانة المعلقين في البي متاع الوتيل ...
وقتلي تتعرى خمسة على رمل البحر و موش في الغرفة..نفس الشي خاتر الصور عراها و عرف هويتها العربية باعتبار انو الصورة تعطينا لمحة على الاخر ..هويتنا بصورنا ...
* الجسد في السينما التونسية مقهور حامل هوية كاملة موش جسد الممثلين متاع الافلام البورنوغرافية اللي بلاش تاريخ و لا هوية و لا هموم ....الجسد في مثال النوري بوزيد كمثال جسد مغتصب و رافض االى كل حاجة تنسيه الام الماضي و تقيه من الادانة الاجتماعية ..المومس شخصية محورية في افلام بوزيد و هو ديما يقول اللي يعشق عالمهم ...المومس ملاذ الشباب الضايع و الكبل بالعقد ..المومس العجوز "شجرة" تحل دارها ال 4 شبان و تفرح بيهم و تكرمهم ..هي وسيطة هوى خلات البطل "الهاشمي" يعرف تجربتو الجنسية الاولى مع "امينة".تقول البطرونة شجرة "انا كل واحد يجيني نفرح بيه و يدخل في قلبي و نحطوا في عيني" ..البطرونة مازالت متشبثة باخلاق الضيافة و العلاقات الانسانية الباهية ..تكره العرك ما بين الشبان خاتر يعكرلها مناخها الداخلي و يوريها سلوك انساني تكرهو وقتلي الهاشمي ال امينة بش يشوفها تقلو "امينة انساها"و تامر امينة بالدخول
صفائح ذهب للنوري بوزيد ...نراو اليساري الماركسي السابق يوسف سلطان يضاجع في مومس عرفها قبل ما يدخل للحبس و نحسوا الي الجسد متع المرا ماهو الا مجال للترفيه كيما الخمرة بالنسبة ال يوسف سلطان

samedi 13 juin 2009

محتال بن بروال .....طبال ابن زكار

جو اليوم موش عادي, جو احتفالي متاع شطيح و رديح ….اخترت موضوع "السود بتونس" فيما يخص اصولهم و مرجعياتهم و عاداتهم ..شوية فزاني و شقاشق و "صطمبالي" و بوسعدية اما ما نحبكمش تتخمروا نقعدوا ما تكملوش تقراو التدوينة الكل ..في الواقع اللي يقوموا بعروض "الصطمبالي" في شمال افريقيا و في تونس بالتحديد يرجعوا في نسبهم ال "بلال بن رباح" ( العبد المعتوق عن طريق محمد صلى الله عليه وسلم) و يعتبروه جدهم المشترك .. لكنو في المقابل لا يعتبر بلال سبب بروز ها الحركات الصوفية الشعبية خاتر مصدرها ما كانش راجع للعبيد بقدر ما كان راجع للزنوج الاحرار في افريقيا السوداء .
بدات في النيجر وجات للمغرب العربي عن طريق تجارة الرق و بذلك تكون فيها انفاس "افريقية" و "اسلامية" فرد وقت
و بش نفهموا بعض عادات ها الجماعة لازمنا نحاولوا نفهموا ها الاسطورة ان صح القول الي تقوم عليها و هي اسطورة بلال ...قيل ان بنت الرسول صلعم مرضت ..و حارو في امرها بما انهم مل قاولهاش الدواء بش تشفى حتى جاء بلال هازز الشقاشق متاعو و بدا يشطح و يعمل في الحس في الشوارع و الاماكن اللي يمشيولها الناس ..ومن وقتها برات المريضة و ولاو البلاليين يبرروا في الطقوس الشعبية اللي يعملوا فيها .....من ناحية اولى راو في هل القصة تشريع للعادات و العروض اللي يعملوها في الشارع بش يجيبوا الفلوس و يدوروا الدولاب .....و من ناحية ثانية "تشريع التطبب" و التقنيات شبه الطبية اللي يستعملوها في شفاء الامراض الجسمية و الروحانية و اخراج الجن و ما الى ذلك من عادات متاع الجهل و التخلف و التدغيف ...


كانت بلاد" السودان"( نقصدوا بيها بلاد الزنوج و موش السودان اللي يتعدى منها النيل بحذا مصر) متكونة من امبراطوريات كيما "مالي" و "قاو" و "بورنو" .....و كانوا محسوبين كمجموعات كافرة اقرب للحيوان اكثر منهم للانسان المتحضر كيما وصفهم ابن خلدون في القرن 14 ....و في خضم الفتوحات الاسلامية بدات حياتهم تنقلب راس على عقب ...كان فما واحد يقولولو "جلاب" يجيب العبيد و العاج و الذهب و يبيعهم في اسواق النخاسة على عين المكان كيما سوق "خوخة " ( عاصمة بورنو ) ولآ يهزهم لبلد الفزان ( منها جاي ايقاع الفزاني............هييه) منين يجيب التجار السلعة الى تونس و مصر....مثلا في تونس كان سوق البركة مكان ينصب بيه التجار و يعتبر "سوق النخاسة" بتونس ....يجيو غادي اعيان و اغنياء البلاد بش يقششوا نهارة الجمعة بعد الصلاة و يفرزو ا نهو خير من البضاعة البشرية المعروضة على صوت "الدلال " اللي يعيط باعلى صوتوا بش يجيب الحرفاء اللي يلي يشريو يمشيو يقيد العبد عند عدل من الثقات بش يكتب المعطيلات متاع العبد ...تعرفوا اللي القانون يحمي الجميع....







وبعد الغاء الرق عام 1846 ولاو الزنوج يتلموا في جماعات عرقية مثلها الاعلى المؤذن بلال اللي يراوه شهيد الله و مؤازر رسول الله ... اللي قالوا ربي فين بش يمشي بش يخلي اولاد(ذرية) ....الجماعات هاذي تتوجد في ديار منها ما يملكها البايات ..كل دار تختلف عن الاخرى في الوظيفة و البلاد اللي جايين منها ...و مباعد ولات الزوايا و الاضرحة متاع الاولياء تحتضن فيهم و تسمحلهم بش يفتقوا مواهبهم قد ما ينجموا خاترها مقر توافد متاع التونسيين في الزيارات ...
كل رئيس دار اسمو "قلاديمة" اللي عندو اصدقائو الموهوبين في عملان السهريات الموسيقية اللي يغنموا منها برشة فلوس على بشكير مطيش قدام الاوركستر و ليالي "الزيارات" يخرجوا هازين علوش كقربان ( خرجة عتروس) و يدورو في المدينة بالشقاشق و الطبال بش يحضبوا العباد و تولي قافلة تسير ..بالطبيعة هاالتقاليد تستقطب النساء اللي امورهم تاعبة اجتماعيا من السود و حتى مل البيض اللي عجبهم الجو متاع التطبب و المعالجة الروحانية عن طريق الحفلات اللي يقيمها الجماعات العرقية السوداء اللي حكيت عليها





..كل جماعة متكونة من 3 فرق موسيقية ..كل فرقة فيها مرأة يعيطولها "العريفة " و هي اللي تحضر الوصفات العجيبة و تتواصل مع "الناس الاخرى " مباشرة ب"المقانيني"( وصفة) تحطها للجنون بش ينفخو فيها و بعد توصية المريض بعدم اكل اي شي او التحدث مع الناس مدة 3 ايام بعد عقدان النية الازم ...و بعد ذلك تجي مرحلة السطمبالي على ايقاع الموسيقى اللي هي حاجة لازمة لاخراج الجنون و الارواح الخبيثة و نزع العين السامة بعد ما يتخمر المريض ...الاوكستر الموسيقي متكون مل "المعلم" يعزف عل "القمبري "و يعزف على الات اخرى حسب المرحلة متاع المعالجة اذاكة علاش معلم بالاضافة الى مخاطبتو للجنون بطريقة غير مباشرة و معرفتوا للحضور و المستحضرات اللي تدوخ و تكوخر بش يتخمر الواحد ..و فما الشقاشق اللي يعملوهم سود وحد اخرين يسايرو القمبري و يبداو على يمينوا و يسارو ..فما صطمبالي خاص و عمومي و سنوي تمشيلها العايلات التونسية و تعتقد في نجاعتها و هذا لارادة المستعمر و ناس كانت على نيتها اما انا مستغرب مل ناس 2009 اللي مازالو يمشيو للحكماء الروحانيين و ضرابة الخفيف ..حتى من ناس متعلمين و مثقفين ....زعمة شنوة الحل؟؟؟؟؟


mercredi 10 juin 2009

وضعية المراة في ايران..قلع بصلة يطلعلك راس ثوم

صادف اني قريت كتاب اسمو"جوناس دي ايران " يحكي على واقع الشباب الايراني جاء في صيغة مقالات لشبان قاومو ا السياسة القمعية متاع النظام الرافض لحرية التعبير و حاولوا يخرجوا اللي يعندهم و يقولوا للغرب احمدوا ربي على النعمة اللي انتوما فيها...رانا في حالة لا نحسد عليها ..و كلينا على ريوسنا لين شبعنا ...حزب وحيد...تتعمل صحيفة تتسكر بعد 3 اشهر...جواز السفر ما ياخذو كان الشاب اللي باش يكمل دراستو العليا ...حكومة ما تسمعش بحاجة اسمها حقوق الانسان ..ما تعرف كان تصويرة الخميني و ما تستعرف كان بيها ..الى جانب الوضع المزري متاع المراة اللي اخترت اليوم بش نحكي عليه باعتبار اللي فما تيار نسائي مازلت يتحسس في خطواتو الاولى رغم معارضة الدولة و العلماء


في الواقع , برشة عباد حضروا على الثورة الايرانية عام1979 و راو الجموع المحضبة و مخلطة نساء و رجال ...الجنسين متحدين عندهم فرد هدف ما يرتاحو كان ما ينفذوه الا وهو الانقلاب على الرئيس السابق "الشاه " اللي كان نظامو "امبريالي" بالاساس و مطفي الضوء على الطبقات المسحوقة من الشعب ...ها الهدف الرجالي –النسائي كان وراؤو احلام مشروعة ...حكومة ديقراطية تعطي قيمة للدين الاسلامي و توزع الثروات توزيع عادل بين مختلف الطبقات ....ياخي حصلوا في المنداف و اومورهم تدهورت اكثر و خصوصا المراة اللي رجعت
الى الوراء ...الوراء ...الوراء


تحت تاثير القانون الشيعي اللي قام بتعديلات في قانون الحالة المدنية "(الطلاق , العقوبات الجنائية, و اجبارية لباس الحجاب ) و هو اللي ارتفع بمستوى المراة الايرانية اللي كلات صوابعها لمساندتها لثورة ...و بدات تحاول تتحدى الصعوبات و تحاول تستعيد شوية من حقوقها اللي كانت تتمتع بيهم قبل 1979 كيما تخدم فرد خدمة كيفها كيف الراجل بدون تمييز على اساس الجنس و المشاركة في الحياة الاجتماعية و السياسية ....
الجدير بالذكر ’ انو هاا لتيار النسائي ينقسم الى" ايرانيات اسلاميات " و" ايرانيات لائكيات "...

شنوة وجه الفرق ما بيناتهم ؟؟؟؟

من ناحية اولى , الايرانيات الاسلاميات ما عندهم على الثورة اي حقد و يراو اللي المشكلة موش في الاسلام اما في التاويل الغالط للنصوص المقدسة شان مسالة الطلاق و غيرها ...العلاقة ما بين الراجل و المراة عندهم هي علاقة "تكامل" و موش "مساواة"..لا مجال عندهم للاختلاط (في الكار, في العروسات و الفروحات , في قاعات الرياضة) ...اما يراو اللي المراة عندها الحق بش تمارس نفس خدمة الرجال , و في نفس وسائل الترفيه ( بناء البيسينات , و مركبات رياضية خاصة بالمراة فقط...) ....كيما يراو اللي لبسان الحجاب هو اداة فعالة لاكتساب احترام الراجل و هو تعبير عن الاعتراف بيهم ككائن انساني عندو ذات و صفات ...و الكف عن اخذ المراة وسيلة لاثارة الشهوة فقط .....

من ناحية ثانية ,نقاو الايرانية الائكية اللي ترى اللي المساواة رهينة "حرية الملبس" ..خاتر الشابات الايرانيات طارتلهم من الحجاب و يحبوا ينساوه الى الابد هذاكة علاش نقاو فما فتيات عاطين برشة مجهود بش يخليو الجزء الامامي متاع شعرهم واضح للعيان ....
الشريحة هاذي بقات مهمشة على خاتر المراة الايرانية عندها حاجات اكثر اهمية و مستعجلة اكثر من مسالة الملبس



شنية هالحقوق المستعجلة؟؟؟
مثال في حالة الطلاق , حضانة الاطفال تعود للاب (عامين بالنسبة للطفل و 7 سنين بالنسبة للبنت) و بما انو ايران تبيح تعدد الزوجات افهموا الوضعية المتدنية عاطفيا اللي بش تقعد فيها المراة ...المسالة هاذي لفتت انتباه المحامية الشهيرة "شيرين عبادي " المتحصلة على جائزة نوبل للسلام و رات الي القانون كلوا تناقضات خاتر حسب القانون البنت اللي عمرها 9 سنين راشدة و الولد 15 سنة راشد و في المقابل عندها الحق تعرس في 9 سنين و ما تصوت كان في الستاش ؟؟؟
فتاة عمرها تسع سنوات تسرق دراجة تتحاسب قدام المحكمة تتحاسب كانسان راشد وقتلي تحب تسافر لازمها تاشيرة ابوية او زوجية

في الخير نحب نلاحظ اللي المراة الايرانية قاعدة تتشجع بالشوية بالشوية ...اييييييييييه فما بنات يقاومو في البوليسية و المليشيات و معلبلهومش بالطقس...ماكياج بالاطنان ..و محاولة اغراء الاولاد في الشارع و لبسان المحزوق و احتساء الخمر رغملي كاس خمر تاخذو يعادل نهارين في الحبس مع الضرب و التاكد ما العذرية ....حياتهم عندها وجهين وجه في الشارع و وجه في الدار الشارع حجاب و الدار ميني حجاب ....و برة ربي معاك سيبني خال نشطح

mardi 9 juin 2009

افعل ما تشاء لتغطية الزنا



و الله صادقة يا اعز ممثلة عرفها العالم العربي..موش بكوارطك جملة

و انتوما؟؟؟

كوربو عنا و لا زواج المتعة الرمالي؟؟؟

vendredi 5 juin 2009

حبك في كينيني طالق نار


بصراحة رب العالمين انا واحد من الناس نموت على بلادي و اللي ما يموتش على بلادو عندي انا ما يستحقش انو يموت على بلادو و لذا انا قررت يا اخي بش نقول ونعاود اني نموت على بلادي.
اما شنوة نموت على بلادي؟؟؟
معنتها نموت عليها ....موش كيما يقول فلان لا يقدر مات ...لا و 100 لا ...اما نموت عليها معنتها ما نعرفش انا معنتها .. نموت عليها كيما نقولوا الواحد يموت على حاجة يموت عليها ...يعني يموت على بلادو كيما انا نموت عليها ...فهمتها كيفاه ؟؟؟
لذا وقتلي نموت على بلادي موش لازم بالضرورة فيه معنى الموت ..انا ما ذبي نموت على بلادي اما بلش موت ..على خاطر لو كان يولي فيها موت .....تولي خوي العزيز فيها حسابات اخرى

عن ربيع المسرح

jeudi 4 juin 2009

السينما في خدمة الشعب


مما لا شك فيه و لا اختلاف اللي الحركة السياسية عرفت اعنف فترة في السبعينات نظرا للاضطرابات اللي شهدتها من جراء حظر نشاط الحزب الشيوعي التونسي و و قف نشاط حركة" افاق" اللي تميزت بتكبيلها ال روحها بقيود ايديولوجية و صراعات داخلية حالت دون اكتسابها لنزعة براغماتية عملية بش تتفاعل مع مقتضيات العصر...و من هدا المنطلق كانت الساحة السينمائية مجالا للتفاعل مع ها الظروف الشائكة عن طريق زوز جمعيات خارقين للعادة هوما الجامعة التونسية للسينمائيين الهواة و الجماعة التونسية لنوادي السينما اللي احتضنوا جميع الطبقات الشعبية و كونوا ارضية ملائمة للتناقش واختلاف الاراء و تكوين ثقافة سينمائية عند الشاب التونسي و حتى بداية لسينمائيين محترفين ....

في الواقع لم تكن ها النوادي حكر على طائفة فكرية معينة و لا على النخبة الثقافية "النتليجنستيا" بل احتضنت مختلف الايديولوجيات المتعارضة من التيار الاسلامي للشيوعيين لليسار المتطرف لليمين...الناس الكل مع بعضها تتناقش توصل للعرك اما بعد يتفاهمو على حل وسط و كانوا الحكام يعتبروا نوادي الشباب "اوكار للتطرف "و"شرذمة من الشيوعيين اللي يعملوا في الدعاية ضد النظام" ووصل بعض البيرقراطيين يدبروا على السينمائيين الهواة بش يمشيو يصوروا بياعة الورد في شارع الحبيب بورقيبة بحذا "ت.ج.م"و لا البلفيدير و لا بحورات المرسى و سيدي بوسعيد في عوض تصوير الاحياء القصدرية و لا الفقر اللي تساند بيه الحركة النقابية ..و ما نحكيوش على سياسة ال 404 على الافلام القصيرة و حادثة 1979 بهرجان قليبية الدولي متاع وزير الشؤون الثقافية ....
الجمعيات هاذي كانت تعمل في تصدي كبير للامبريالية و خاصة امبريالية الصورة ...سينما بديلة اما خسارة موش لاقية حظها ..نشالله تعاونوها انتوما بتشجيعكم ليها

بش نحكي توة على واحد من الافلام اللي تلها بالحركة اليسارية بتونس و منها فيلم "صفائح ذهب" اللي تلها بحركة برسبكتيف (حركة يسارية ماركسية) اللي عملت على التصدي لظاهرة الحزب الوحيد و القائد الاوحد ...الفيلم ورى تجربة التزام مناضل يساري (يوسف سلطان قام بدوره هشام رستم) و طغات عليه مشاهد الحزن اهمها صورة مصرع الحصان برشة مرات و لا الدم اللي يغمر الازقة اللي يتسكع فيها يوسق سلطان و هو سكران محبط و العرك مع خوه الخوانجي ...بالطبيعة فيه تاكيد على اجهاض احلام اليسار الماركسي و نشوء الحركة التطرفية الاسلامية ....

lundi 1 juin 2009

الكوميديا الجنسية




ظاهرلي اي واحد بش يدخل للمدونة المتواضعة متاعي بش يلاحظ اللي كثرتلها بالشبقية الجنسية و "الاوبسسيون" و حكايات الدعارة و المومسات …المدونة متاعي ماهيش" سكسيوتاك" اما نحب نسلط الاضواء على مسائل تثير انتباهي و تثير مشاكل برشة مراهقين في عمري ...يجعلناش نخرجوا من حالة السبات العقلي اللي راقدين فيه اهم المجتمعات العربية من جراء تهويل حكايات فارغة و تفاهات ما ليها معنى و ردانها مسائل مسكوت عنها تحمر الوجه و تدخل الواحد بعضو ....رغملي نعرفوا اللي "لا حياء في الدين" و اللي رسولنا الكريم صلى الله عليه و سلم كان يغتسل هو السيدة خديجة و يفدلكو مع بعضهم بعد الجماع ....... ما غير حتى مشكل و لا حشمة مل العلاقة الجنسية

في الواقع يكذب عليك اللي يقولك فما واحد مطفي الضو في المسالة الجنسية في صفوفنا احنا المراهقين ...اما درجة الاهتمام تختلف بطبيعة الحال بحكم الفوارق البيولوجية و الثقافية و النفسانية ..الجنس ديما محل اهتمام الجميع فما عباد حاسبينها حكاية كبيرة لازمها طاولة و كراسي و تكمبيس بش يوصلو ال غاية مرادهم و فما عباد اخرين مقزمينها ..توة كي تجي تشوف تلقى اغلبيتنا يراو اللي لولاد يعرفوا الحب عن طريق الجنس و البنات يعرفوا الجنس عن طريق الحب ...شوف حكمة ربي ؟؟؟؟

رغم تكبيشنا بيدينا و ساقينا في العادات و التقاليد الاسلامية خاترها طريق لابعادنا عن الخطيئة و العار و اسالة ماء الوجه نلقاو الي في تونس عندنا نسبة حرية جنسية و صلت لنسبة 40 بالمية ....اييييييييه رغم الترهدين و الداء و الاعداء..

.مشكلتنا احنا المراهقين تتمثل في في كيفية استيعاب الحب و الجنس فرد وقت ...خاترها حاجة صعيبة و مكرزة فرد وقت و الحماية من الامراض المنقولة جنسيا بش ما نحكيش ياسر على المشاكل الاجتماعية اللي تراوها ما بين تونس 7 و قناة حنبعل في لقاء ليلي شبه يومي و هي سهريات ممتعة على الفضائيات التونسيات ..قنوات النواح في الافراح رغملي جايبينها تونس بلد الفرح الدائم ؟؟؟

من ناحية اولى ..الحب اول حاجة تظهر عند الواحد مع بوه و امو ...و كان الوالدين ما يحترموش مسافة الامان ما بينهم و ما بين صغارهم يقعد المراهق في حالة تعلق شديد سواء الولد و لا الطفلة ..الولد يقعد متعلق بالسيدة الوالدة و يمارس الجنس مع بنات ما يحبهمش و الطفلة تقعد بنت بوها و يوليو الرجال جابدين رواحهم ...فر فر منها
نعطيكم مثال ساعات تلقى واحد مصوحب وحدة و ديما يتعارك معاها و مديما شانع فيها ..يجي بش يقصهامعاها يهمزو ابليس و يبطل.......علاش زعمة ؟؟؟
خاتر في اللاوعي متاعو تقعد الام اكثر كائن متعلق بيه و تولي علاقتو بصاحبتو علاقة ام بولدها ..و بالطبيعة شكون يكره امو؟؟؟؟
في حالة الطفلة نقاو الوالدين هابطين عليها بالكادوات بش ينقصو حدة شهوتها و تفعد سلاحها الوحيد هو الصمت للتعبير عن الرفض و وقتها تبدى تبعد عل الجنس الاخر.....

برجولية نحب نتلهى بالنقص في الثقافة الجنسية عندنا و عند الوالدين اللي يراو فيه كوشمار من جرة الخوف من الزنا ..اذاكة علاش قليل بش تقى شكون يتحاور مع ولادو في الامور هاذي...القراية و ما قالت الناس .....و رغم الجهود من 1970 بهدف الحد من النسل و حملات التوعية الجنسية و "قلل و دلل"...يقعد المجتمع في حالة عملتنا العارخاتر ترى فيها تشجيع على الخلاعة و الحرية و افساد الشبيبة رغملي جاين بش يحميوهم ...سي بوكشطة ولا بو لحية مثال يلزم على بنتو تكون خيمة صيفية متنقلة و يغض النظر عن اهتمامتها...شبيك راهي جاية من ضلع اعوج ؟؟؟؟
انا واحد من الناس عندي شكون استاذ في ليسي عثر عند تلميذتو المتحجبة المتنقبة كراس ذكريات ...اية طلعوا اش فيهال يا عباد الله ؟؟؟؟؟؟
يطلع فيها حديث عن التجارب الجنسية متاع صاحبلتها و عبارات الامتنان ليها خاتر للة الحاجة عاملة ريزو متاع دعارة ما بين صاحباتها...و هكة ينطبق علينا مثل " تحت الجبايب ترى العجايب"
باله يزيونا من الكبت و الضرب و القسر و تعلموا احكيو مع ولادكم ..........
نهار جاونا لليسي باش يوزعوا علينا برازرفاتيف ناس الكل لابدة و خايفة ....روحت للدار و خليت الواقي في جيبي تقا الرفال...دورتهالي عقيدة و سلوك و فسق و تمنييك على بنات الناس

ماهيش كوميديا جنسية ؟؟